2014再獻新猷:「識飲識食
● 惜身惜食」【一月】
謙善老師繼續2013年之創舉:「惜身惜食•識飲識食」,我仍舊本着那宗旨來彼此鼓勵:首先惜身,繼而養生,最後識飲識食。於每月下旬,發放一則養生/飲食的信息。
一月份特寫:千金難買老來瘦
去年聖誕,在街上偶遇友人,她指着內子驚叫:您瘦咗咁多,要食番多D嘢先至得呀!我笑笑隨即搭咀:千金難買老來瘦。她反駁我:老來要發福吖嘛!回家後翻查記錄,2013年初内子體重為119磅,而12月中體重則為114.5磅。
觀點抑或角度,您點樣睇?!
後生仔女唔知驚,一為減壓,二為追隨飲食潮流,試完東家到西家,愈夜愈滋味,總之不理三七二十一,美食當前,大快朶頤,將自己變作人肉焚化爐……不知不覺,中年發福,後患無窮。不可不知,多種毛病如高血壓、高血脂、關節痛、癡肥、抑鬱……皆因是身體發福之過,信不信由得您。老師我就係怕得要死;病咗,自作自受,老來都唔想連累親人或友人。您話係唔係呢!
真人真事:
•心水清的看官還記得2013年一月份特寫,謙善老師幾多磅?一向讒咀的我,若不是克己節制,豈能無加磅,還輕了1/2磅,元月1日的體重是138.5磅。謝天謝地!
•月娥美國一行,All You Can Eat,重了20磅。
•美姐返港四天,盛情難卻的款待,結果是重了3磅。
食落肚,唔講究,疴出來,要時間。真的唔喺呃您,食時容易疴時難!年頭到年尾,您食幾多,肚腹至爭氣,即當會表現出嚟。又唔講您唔知,我和內子,一年內只吃過2/3塊西多士,1/3由他人分擔風險。這就是千金難買老來瘦的秘訣,喺咁樣,先至可以修成正果!
傳聞坊間10大肥死人茶餐廳食物:
第1位:西多士 第2位:炸豬扒公仔麵 第3位:干炒牛河 第4位:餐蛋飯 第5位:雞翼
第6位:芝士火煺意粉 第7位:鹹牛肉蛋治 第8位:朱古力奶昔 第9位:雪糕紅荳冰
第10位:豬骨湯
謙善老師惜身惜食雋語:
千金難買老來瘦
五臟六腑要遷就
食得不當壞肚皮
惜身惜食要講究
沒有留言:
張貼留言